- ब्रह्मदेव यादव, विराटनगर ४६९ पटक हेरिएको
बिहिबार, बैशाख ०३, २०८३ समय : १३:४९:३६ , ६ दिन अगाडि
नेपाल भारतको सीमान्त क्षेत्र जोगबनी नाकाको नेपाल तर्फको दशगजा क्षेत्रमा रहेको घर तथा पसलको ढोका बन्द गरिएको छ । मोरङका प्रमुख जिल्ला अधिकारी युवराज कट्टेलको पटक–पटकको अनुगमनपछि जारी भएको कडा निर्देशनको पालना गराउँदै जिल्ला प्रहरी कार्यालय मोरङको पहलमा दशगजा क्षेत्रको घर तथा पसलको ढोका बन्द गराइएको हो ।
विराटनगर महानगरापलिकासंग सिमाना जोडिएको नेपाल भारतको अन्तर्राष्ट्रिय सिमानाका जोगबनी नाकाको नेपालतर्फको दशगजा क्षेत्रमा चोरी–तस्करी गर्ने गराउने उद्देश्यका साथ स्थानीयवासीले घर तथा पसलमा अगाडी पछाडि दुवै तर्फ ढोका राख्ने चलन थियो । जुन ढोकाबाट नेपालबाट भारत र भारतबाट नेपालमा चोरी तस्करीको सामान सहज रूपमा आयात निर्यात भइरहेको थियो ।
नेपालमा कोभिड–१९ महामारी चलिरहेको बेला नेपाल र भारतका बासिन्दा बिच आवतजावतमा सरकारले पूर्ण रूपमा रोक लगाएको बेला दुवै देशका नागरिकसँग रुपैयाँ लिएर दशगजा क्षेत्रको घर तथा पसलबाट स्थानीयवासीले मानिसको आवतजावत गराएका थिए ।
कोभिड–१९ महामारीको बेला मात्रै दशगजा क्षेत्रका प्रत्येक घर तथा पसलका मालिकले १५ देखि २० लाख रुपैयाँसम्म रकम आर्जन गरेका थिए । यस बाहेक प्रत्येक महिना उनीहरूले तस्कर गिरोहसँग घरको ढोकाबाट सामान आयात निर्यात गर्न दिएबापत लाखौँ रुपैयाँ असुली गरिरहेका छन् ।
सीमान्त क्षेत्रमा तस्कर गिरोहले प्रहरीको सेटिङमा रातीको समयमा दशगजा क्षेत्रमा रहेको घर तथा पसलबाट मोटो रकम बराबरको सामान तस्करी भइरहेको सूचना प्रशासनले प्राप्त गरेको थियो ।
दशगजा क्षेत्रको घर तथा पसलबाट तस्करी भइरहेको सूचनाको आधारमा मोरङका प्रमुख जिल्ला अधिकारी कट्टेलले केही दिन अगाडी ती घर तथा पसलको अनुगमन गर्दा मोटो परिणाममा दालको बोरा, खाद्यान्न सामग्री र लत्ताकपडा लगायतका सामग्री फेला पारेका थिए ।
प्र.जि.अ. कट्टेलको कडा निर्देशनपछि दशगजा क्षेत्रमा रहेको घर तथा पसलको भारत तर्फ रहेको ढोका बन्द गरिएको छ । जिल्ला प्रहरी कार्यालय मोरङ मातहत रहेको ईलाका प्रहरी कार्यालय रानी र ईलाका प्रहरी कार्यालय सीमाको प्रहरी अधिकारीको उपस्थितिमा दशगजा क्षेत्रको घर तथा पसलमा रहेको पछाडि तर्फको झ्याल तथा ढोका हटाएर इट्टा पर्खाल लगाइएको छ ।
जसको कारण सीमान्त क्षेत्रका तस्कर गिरोह सरकारसँग असन्तुष्ट रहेको तस्कर गिरोह निकट समाचार सूत्रले जानकारी गराएको छ ।
