- चिरफार डटकम, विराटनगर १५९ पटक हेरिएको
शुक्रबार, भाद्र १३, २०८२ समय : १३:१५:२४ , १६ घन्टा अगाडि
कोशी प्रदेश सरकारले ल्याएको आमसञ्चार विधेयक विरुद्ध विराटनगरका पत्रकारहरूले शुक्रबार कोशी प्रदेश सभा अगाडी धर्ना तथा प्रदर्शन गरेका छन् । पत्रकारहरूले विहीबार कोशी प्रदेशका मुख्यमन्त्री तथा मन्त्री परिषद्को कार्यालय अगाडी धर्ना तथा प्रदर्शन गरेका थिए ।
नेपाल पत्रकार महासंघ कोशी प्रदेश समितिको आयोजनामा आमसञ्चार विधेयक विरुद्ध विराटनगरका पत्रकारहरू निरन्तर आन्दोलनमा सहभागिता जनाइरहेका छन् । कोशी प्रदेश सरकारले समाचार लेखेकै आधारमा पत्रकारलाई बढीमा डेढ लाख रुपैयाँसम्मको दण्ड र जरिवाना गर्न व्यवस्था गर्न लागेको छ । दण्ड र जरिवाना गर्न निर्माण गर्न लागिएको आमसञ्चार विधेयक भाद्र ६ गते शुक्रकार कोशी प्रदेश सभामा पेस भइसकेको छ ।
कोशी प्रदेश सभाबाट विधेयक पारित भइसकेपछि कानुनी मान्यता पाउने छ । कोशी प्रदेश सरकार मन्त्री परिषद्को बैठकले आमसञ्चार विधेयकलाई अनुमोदन गरिसकेका छन् । विधेयक न्याय प्रशासन तथा विधायन समितिबाट पारित भएर प्रदेश सभामा पेस भएका छन् ।
नेपाल पत्रकार महासंघ कोशी प्रदेशका अध्यक्ष भरत खड्का, महासंघका निवर्तमान कोशी प्रदेश अध्यक्ष तथा सल्लाहकार लिलाबल्लभ घिमिरे, महासंघका महासचिव हिमा च्याम्जुङ, महासंघका निवर्तमान महासचिव तथा प्रेस सेन्टर नेपालका केन्द्रीय उपाध्यक्ष विवेक गौतम, महासंघका मोरङ अध्यक्ष सुशिला पाठकले आमसञ्चार विधेयकमा पत्रकारलाई दण्डित गर्न राखिएको प्रावधान खारेज नभएसम्म निरन्तर आन्दोलन जारी रहने उद्घोष गरेका छन् ।
नेपाल पत्रकार महासंघ कोशी प्रदेश समितिले आमसञ्चार विधेयकमा पत्रकारलाई अंकुश लगाउने गरी राखिएको प्रावधानबारे कोशी प्रदेशका मुख्यमन्त्री हिक्मतकुमार कार्कीलाई ज्ञापन पत्र बुझाएर जानकारी गराइ सकेका छन् ।
