- ब्रह्मदेव यादव, विराटनगर ४२६ पटक हेरिएको
बुधबार, मंसिर १०, २०८२ समय : १४:२९:१९ , ३ दिन अगाडि
उपेन्द्र यादव नेतृत्वको जनता समाजवादी पार्टी नेपाल मोरङ जिल्ला समितिले संविधान पुर्नलेखन र सङ्घीयतालाई बलियो बनाउने माँग गर्दै सरकारलाई ज्ञापन पत्र बुझाएका छन् ।
जनता समाजवादी पार्टी नेपालले आफ्ना न्यायसङ्गत माँगहरु सम्बोधन गराउन सरकारलाई दवाव दिने उद्देश्यका साथ देश व्यापी रूपमा सङ्घर्षका कार्यक्रम सार्वजनिक गरेका छन् ।
जनता समाजवादी पार्टी नेपालले सार्वजनिक गरेका सङ्घर्षका चरणबद्ध कार्यक्रम अन्तर्गत पहिलो चरणमा बुधबार सरकारलाई ज्ञापन पत्र बुझाएको हो ।
जनता समाजवादी पार्टी नेपालका केन्द्रीय कार्यकारिणी समिति सदस्य जयराम यादव, केन्द्रीय सदस्य सदिना खातुन, रञ्जु बर्मा, सुरेश सिंह गनगाई, कोशी प्रदेश समितिका उपाध्यक्ष अनिल ठाकुर, मोरङ जिल्ला अध्यक्ष राजकुमार यादव, उपाध्यक्ष मन्तलाल यादव, मो. हकमुदिन, सचिव हरिनारायण साह सहितका नेता कार्यकर्ताहरूको टोलीले मोरङका प्रमुख जिल्ला अधिकारी युवराज कट्टेल मार्फत प्रधानमन्त्री सुशिला कार्कीलाई २८ बुँदे माँग उल्लेख गरिएको ज्ञापन पत्र बुझाएका हुन् ।
जनता समाजवादी पार्टी नेपालले मंसिर ११ गतेदेखि १५ गतेसम्म सङ्घीय र प्रदेश स्तरीय निर्वाचन क्षेत्रमा विरोधका कार्यक्रम अन्तर्गत कोणसभा र जनपरिचालन अभियान सञ्चालन गर्ने छ ।
मंसिर १९ देखि २१ गतेसम्म जिल्ला सदरमुकाम स्थित जिल्ला प्रशासन कार्यालय अगाडी २८ बुँदे माँग समेटिएको प्ले कार्ड र ब्यानर सहित शान्ति पूर्ण धर्नाका कार्यक्रम सञ्चलन गर्नेछ ।
मंसिर २७ देखि पुस ४ गतेसम्म देशका ६८ जिल्लामा संगठन रहेको जिल्लामा जिल्ला स्तरीय विरोध सभा तथा जनसभा आयोजना गर्नेछ । जसपा नेपालले पुस १२ गते विराटनगरमा कोशी प्रदेश स्तरीय विरोध सभाका कार्यक्रम सञ्चालन गर्ने सङ्घर्षका कार्यक्रम सार्वजनिक गरेका छन् ।
