- ब्रह्ममदेव यादव, विराटनगर २८७ पटक हेरिएको
शनिबार, भाद्र १४, २०८२ समय : १८:२२:१० , ९ घन्टा अगाडि
विराटनगरका मधेसी समुदायले बराबर अधिकार पाउनका लागि एक ठाउँमा उभिनु पर्ने आजको एक मात्र विकल्प रहेको कुरामा जोड दिएका छन् । मधेसी उत्थान विचार मञ्च विराटनगर मोरङले शनिबार विराटनगरमा आयोजना गरेको “मधेसी राजनीति दशा एवं दिशा” विषयक विचार गोष्ठीमा मधेसी अगुवाहरूले राज्यको हरेक निकायमा बराबर अधिकार पाउनका लागि सङ्गठित भएर अगाडि बढ्नु पर्ने निष्कर्ष निकालेका छन् ।
युवा राजनीतिज्ञ उमेश यादवले विराटनगरसहित मोरङ जिल्ला भरिका मधेसी समुदायलाई एक ठाउँमा ल्याउन मधेसी उत्थान विचार मञ्चको गठन गरेका छन् । र मञ्चले पहिलो पटक शनिबार विराटनगरमा मधेसी एकता र मधेसी अधिकार प्राप्तिका लागि मधेसी समुदायलाई एउटै मञ्चमा उभ्याउने प्रयास गरेका छन् ।
गैर मधेसीलाई कार्यक्रममा बोलाइएको थिएन । र बोलाइएका जति मधेसी समुदायका मात्रै रहेका थिए । मधेसी उत्थान विचार मञ्चका संयोजक उमेश यादवले विराटनगरमा ६३ देखि ६५ प्रतिशतसम्म मधेसी समुदायको जनसंख्या रहेको तर तीन तहकै सरकारमा मधेसी समुदायको सहभागिता न्यून रहेको प्रतिवेदन प्रस्तुत गरे । बराबर अधिकार प्राप्तिका लागि आफु मधेसी उत्थान विचार मञ्च गठन गरेर अगाडी बढेकोले सबै मधेसी समुदायलाई साथ दिन आव्हान गरे ।
नेपाली कांग्रेसबाट कोशी प्रदेश कोषाध्यक्ष राजेश गुप्ता, युवा नेता रञ्जित झा, सलिम अंसारी, मो. फैयाज, विराटनगर–९ का वडाध्यक्ष विश्वनाथ भगत (लालु) र विराटनगर–१५ का वडाध्यक्ष प्रकाश साहले कार्यक्रममा सहभागिता जनाएर मन्तव्य व्यक्त गरेका थिए । नेकपा एमालेका युवा नेता मृत्युन्जय झा, जसपा नेपालका केन्द्रीय सदस्य जोगिलाल यादव, रामविलास यादवले कार्यक्रममा सहभागिता जनाएर मन्तव्य व्यक्त गरेका थिए ।
नेकपा (एकीकृत समाजवादी) का केन्द्रीय सदस्य ओसिम आलमले मधेसी भाेटर इमान्दार रहेको तर त्यो भोटको मधेसी नेताले अपमान गरेको बताए । मधेसी बुद्धिजीवी रामरिझन यादव, डा.महादेव भगत, जफर जमाली, साहेब अहमद गुड्डु, मो. कादिर, रामप्रसाद साहले २०६२/०६३ को मधेस विद्रोह हुँदा मात्रै मधेसी समुदाय एक ठाउँमा आएकोले सत्तामा बराबर सहभागिता भएको बताए ।
वत्ताहरुले मधेस विद्रोह पछि २० वर्षको अवधिमा मधेसी जहाँको त्यही रहेको अवस्थामा अर्को मधेस विद्रोहको आवश्यकता रहेको कुरामा जोड दिए ।
कार्यक्रममा मोरङ उद्योग व्यापार संघका पूर्व अध्यक्ष एवं नेपाल उद्योग परिसंघ कोशी प्रदेशका वरिष्ठ उपाध्यक्ष प्रकाश मुन्दडा, उद्योग संगठन मोरङका अध्यक्ष नन्दकिशोर राठी, र मोरङ उद्योग व्यापार संघका वरिष्ठ उपाध्यक्ष अनिल साह सहभागी थिए ।
वरिष्ठ उपाध्यक्ष साहले कार्यक्रममा आफ्ना धारणा राखेका थिए । मधेसी उत्थान विचार मञ्चका संस्थापक मैथिली अभियानका प्रविण नारायण चौधरीले कार्यक्रम सञ्चालन गरेका थिए । ३ सय भन्दा बढी मधेसी समुदायका अगुवाहरू कार्यक्रममा सहभागी थिए ।
