- चिरफार डटकम, विराटनगर ३८७ पटक हेरिएको
आइतबार, भाद्र १५, २०८२ समय : १५:२३:०४ , ५ घन्टा अगाडि
विराटनगरका युवा उद्यमी दिलसाद आलमले विराटनगर महानगरपालिकाको वडा नं. १८ खोक्साहास्थित श्री जनता आधारभूत विद्यालयको जग्गा खरिदका लागि ५० हजार रुपैयाँ सहयोग गरेका छन् ।
विद्यालयले १४ लाख रुपैयाँमा ४ कठ्ठा जग्गा खरिद गर्न लागेको हो । जसमध्ये विद्यालयले ५ लाख रुपैयाँ सहयोग रकम जुटाएर केही जग्गा खरिद गरिसकेका छन् । र केही खरिद गर्न प्रक्रियामा रहेका छन् ।
विद्यालयले थप आर्थिक सहयोग जुटाउनका लागि शनिबार आयोजना गरेको छलफल कार्यक्रममा युवा उद्यमी आलमले ५० हजार रुपैयाँको चेक हस्तान्तरण गरेका छन् ।
नेकपा ऐमालेका नेता विनोद ढकाल, रामलाल साह, विराटनगर–१८ का वडाध्यक्ष जितेन्द्र साहको उपस्थितिमा विद्यालय व्यवस्थापक समितिका अध्यक्ष परमानन्द यादव र विद्यालयका प्रधानाध्यापक राजकुमार सरवरियालाई ५० हजार रुपैयाँको चेक हस्तान्तरण गरेका थिए ।
युवा उद्यमी आलमले विद्यालयले खरिद गर्न लागेको जग्गामा निर्माण हुने भवनका लागि थप रकम सहयोग गर्ने प्रतिबद्धता व्यक्त गरेका छन् । पूर्व शिक्षक एवं समाजसेवी विराटनगर–१० निवासी सूर्यनारायण यादवले कार्यक्रममा विद्यालयले खरिद गर्न लागेको जग्गाका लागि ११ हजार रुपैयाँ सहयोग गरेका छन् ।
कार्यक्रममा उपस्थित नेकपा एमालेका नेता विनोद ढकालले विद्यालयको जग्गा खरिदका लागि आफूले पनि केही रकम सहयोग गर्ने प्रतिबद्धता व्यक्त गरेका छन् ।
