- चिरफार डटकम, विराटनगर २५३ पटक हेरिएको
आइतबार, भाद्र १५, २०८२ समय : १७:४४:२८ , ४ घन्टा अगाडि
ग्लोबल बायो इनर्जी इन्भेष्टमेन्ट प्रा.लि.ले उत्पादन गरिरहेको फर्नेस आयलको उत्पादन बन्द गर्न कटहरी गाउँपालिकामा आइतबार उजुरी परेको छ ।
मोरङको कटहरी गाउँपालिकामा सञ्चालित उद्योगले टायर जलाएर फर्नेस आयल उत्पादन गर्दा त्यहाँबाट निस्कने प्रदुर्षणले ६ हजार स्थानीयवासी पीडित रहेको भन्दै उद्योगको उत्पादन बन्द गर्न कटहरी गाउँपालिकामा उजुरी परेको हो । कटहरी गाउँपालिकाको वडा नं. ४ मा उद्योग सञ्चालन भइरहेको छ ।
वडा नं. ३ र ४ का ६ हजार सर्वसाधारण उद्योगको प्रदुर्षणबाट पीडित छन् । प्रदुर्षणका कारण उद्योगको उत्पादनमा रोक लगाउन माँग गर्दै कटहरी गाउँपालिकामा उजुरी दर्ता गराएको स्थानीयवासी राधे कामतले जानकारी गराए । उद्योगको सञ्चालक विनीत सिंघानियाले टायरलाई जलाएर नभई पगालेर फर्नेस आयल उत्पादन भइरहेको बताए ।
फर्नेस आयल उत्पादनका लागि टायरलाई आगोमा पगाल्नु पर्छ । टायरलाई पगाल्न दाउरा बाल्नु पर्छ र दाउराबाट निस्किरहेको धुवाले कुनै प्रकारको प्रदुर्षण हुन नसक्ने बताए । ८ वर्षदेखि सञ्चालनमा रहेको उद्योगका विरुद्ध प्रदुर्षणको विषयलाई लिएर कुनै किसिमको उजुरी नपरेको उनले बताए । केही वर्ष अगाडीसम्म भारतबाट नेपालमा फर्नेस आयल आयात भइरहेको थियो ।
पछिल्लो समय नेपालमा फर्नेस आयलको उत्पादन सुरु भएको छ । फलाम तथा दण्डी उद्योग, बिस्कुट उद्योग र सडक विभागले सडक निर्माणका लागि बढी तापक्रम उत्पादन गर्न फर्नेस आयलको प्रयोग गरिरहेका छन् ।
