- ब्रह्मदेव यादव, विराटनगर ५३२ पटक हेरिएको
सोमबार, मंसिर २२, २०८२ समय : १४:१६:१४ , १ महिना अगाडि
मोरङ उद्योग व्यापार संघले पुस ९ गतेदेखि विराटनगरमा विराट ट्रेड एक्स्पो २०८२ को आयोजना गर्न गइरहेको छ । विराटनगर महानगरपालिकाको वडा नं. १ स्थित जिल्ला प्रहरी कार्यालय मोरङको दक्षिण तर्फको खुल्ला मैदानमा आयोजना गर्न लागिएको विराट ट्रेड एक्स्पो पुस १९ गतेसम्म चल्ने छ ।
मोरङ उद्योग व्यापार संघले सोमबार पत्रकार सम्मेलन गरेर विराट ट्रेड एक्स्पो सम्पन्न गर्न २ करोड ५० लाख भन्दा बढी रुपैयाँ खर्च लाग्ने जानकारी गराए ।
संघका अध्यक्ष अनुपम राठीले संघका सचिव अमित सारडालाई संयोजक र कार्यसमिति सदस्य विनित सिंघानियालाई सह–संयोजकको जिम्मेवारी दिएर विराट ट्रेड एक्स्पोको कामलाई अगाडी बढाइएको बताए ।
नेपाल, भारत, बंगलादेश र पाकिस्तान गरी चार देशका २ सय ३० देखि २ सय ४० वटा स्टल विराट ट्रेड एक्स्पोमा रहने अध्यक्ष राठीले बताए ।
अध्यक्ष राठीले सुनसरी–मोरङ औद्योगिक करिडोरको प्रवर्द्धन, विकास, वृद्धि र अर्थतन्त्रलाई चलायमान बनाउने उद्देश्यका साथ एक्स्पोको आयोजना गर्न लागेको बताए ।
एक्स्पोका लागि ८० प्रतिशत स्टल बुक भइसकेको अध्यक्ष राठीले बताए । एक्स्पोमा २६ वटा विदेशी स्टल रहने छ । सबै देशको पहिचान झल्किने गरी स्टलको अगाडी देश र कम्पनीको नाम रहने राठीले बताए ।
बिहान १० बजेदेखि राती ९ बजेसम्म एक्स्पो संचालनमा रहने छ । एक्स्पो प्रवेशका लागि १ सय ५० रुपैयाँ टिकटको मूल्य निर्धारण गरिएको छ । एक्स्पोको अवलोकन गर्न आउने स्कुल र कलेजका विद्यार्थीहरूको हकमा टिकट नलाग्ने व्यवस्था गरिएको छ ।त्यसका लागि स्कुल र कलेजका सञ्चालकहरूले विद्यार्थीहरूलाई स्कुल र कलेजकै पोसाकमा ल्याउनु पर्नेछ । एक्स्पो अवधिभर दर्शकलाई मनोरञ्जन प्रदान गर्ने गरी स्थानीय र राष्ट्रिय कलाकारहरूको प्रस्तुति रहने छ ।
