• चिरफार डटकम, विराटनगर २२२  पटक हेरिएको

बिहिबार, पुष १०, २०८२ समय : १४:५०:३६ , २३ घन्टा अगाडि

७ वर्षपछि कोशी प्रदेशको राजधानी विराटनगरमा अन्तर्राष्ट्रिय मैथिली सम्मेलन हुन लागेको छ । मैथिली एसोसिएशन नेपालको केन्द्रीय कार्यालय विराटनगरले पुस १२ र १३ गते विराटनगरमा अन्तर्राष्ट्रिय मैथिली सम्मेलनको आयोजना गर्न लागेको हो ।

मैथिली एसोसिएशन नेपालका अध्यक्ष प्रविण नारायण चौधरीले बिहीबार विराटनगरमा पत्रकार सम्मेलन गरेर पुस १२ र १३ गते आयोजना गर्न लागेको अन्तर्राष्ट्रिय मैथिली एसोसिएशनको सम्पूर्ण तयारी पुरा भएको जानकारी गराए । १० लाख भन्दा बढी रकम खर्चेर आयोजना गर्न लागेको विराटनगरको अन्तर्राष्ट्रिय मैथिली एसोसिएशनमा नेपाल, भारत र अन्य देशका गरी १ सय ५ जना विशिष्ट व्यक्तिहरूको सहभागिता रहने छ ।

कोशी प्रदेशका मुख्यमन्त्री हिक्मतकुमार कार्की नेतृत्वको सरकारले मैथिली भाषाभाषीलाई सम्मान गर्दै अन्तर्राष्ट्रिय मैथिली सम्मेलन सम्पन्न गर्नका लागि ३ लाख रुपैयाँ सहयोग गरेका छन् । मधेस प्रदेशका प्रदेश प्रमुख डा. सुरेन्द्र लाभको प्रमुख आतिथ्यतामा आयोजना हुन लागेको अन्तर्राष्ट्रिय मैथिली सम्मेलनमा कोशी प्रदेशका पर्यटन, वन तथा वातावरण मन्त्री सदानन्द मण्डलसहित ५ सय जना मैथिली भाषाभाषीहरुको सहभागीता रहने छ ।

२ दिने अन्तर्राष्ट्रिय मैथिली सम्मेलनको दौरान मैथिली एसोसिएशन नेपालले विद्यापति स्मृति सभा, शोभा यात्रा, सांस्कृतिक झाँकी प्रदर्शनी एवं शंखघोष, उद्घाटन समारोह, तीन विषयमा विद्वत् विमर्श सत्र, कवि सम्मेलन, सांस्कृतिक साँझ (तृत्य प्रस्तती), जम्मा आठ विषयमा विद्वत् विमर्श सत्र, सांस्कृतिक साँझ (गीत प्रस्तुती) र विराटनगर घोषणा पत्र जारी गर्दै समापन समारोहको घोषणा हुनेछ ।

पत्रकार सम्मेलनमा मैथिली एसोसिएशन नेपालका केन्द्रीय उपाध्यक्ष पंकज बर्मा, आभा अनुपमा र सचिव भास्कर चौधरीले विराटनगरमा आयोजना हुने लागेको अन्तर्राष्ट्रिय मैथिली सम्मेलनको विविध पक्षबारे जानकारी गराएका थिए । मैथिली अभियानता डा. एस.एन. झा र डा. योगेन्द्र यादव पत्रकार सम्मेलनमा सहभागी थिए ।