- ब्रह्मदेव यादव, विराटनगर २६८ पटक हेरिएको
शुक्रबार, आषाढ २६, २०८३ समय : १७:४४:०५ , १८ घन्टा अगाडि
जिल्ला प्रशासन कार्यालय मोरङले कोशी अस्पतालको कब्जा गरिएको जग्गामा निर्माण गरिएको व्यवसायीक पसलमा डोजर चलाउने गरी रातो सङ्केत चिन्ह लगाएको छ । जिल्ला प्रशासन कार्यालय मोरङ र कोशी अस्पताल प्रशासनले कोशी अस्पतालको कब्जा गरिएको जग्गा खाली गर्न सोमबार ७ दिने अन्तिम अल्टिमेटम दिएको छ ।
आइतबार ७ दिने अन्तिम अल्टिमेटमको समय सीमा सकिँदै छ । त्यसपछि जिल्ला प्रशासन कार्यालय मोरङ र कोशी अस्पताल प्रशासनको बस्ने बैठकले डोजर चलाउने मिति तय गरिने छ । जिल्ला प्रशासन कार्यालय मोरङले पहिलो चरणमा डोजर चलाउन लागेको व्यवसायीक पसलमा रातो चिन्ह लगाएको छ ।
तत्कालै डोजर नचल्ने सामाजिक संस्थाको भवनमा रातो चिन्ह नलगाएको मोरङका प्रमुख जिल्ला अधिकारी युवराज कट्टेलले जानकारी गराए । कोशी अस्पतालले शुक्रवार पत्रकार सम्मेलन गरेर डोजर चलाउन लागेको व्यवसायीक पसलको नाम सार्वजनिक गरेको छ ।
कोशी अस्पतालका प्रमुख मेडिकल सुपरिटेन्डेन्ट डा. चन्द्रभाल झा र जनसम्पर्क अधिकारी नवराज लुइँटेलले नेपाल क्षयरोग निवारण संस्था मोरङ, नेपाल रेडक्रस सोसाइटी मोरङ, गणेश मन्दिर विराटनगर र देवकोटा पुस्तकालय विराटनगरले कब्जा गरेका जग्गामा निर्माण गरेको भवनमा सञ्चालनमा रहेको व्यवसायीक पसलमा डोजर चलाउन लागेको जानकारी गराए ।
प्रमुख मेडिकल सुपरिटेन्डेन्ट डा. झाका अनुसार गणेश मन्दिरको मातहत रहेको उज्ज्वल फर्मा, कलश फर्मा, किसन किराना पसल, श्रृती फार्मेसी र बालबालिका क्लिनिक, नेपाल क्षेयरोग निवारण संस्था मोरङको मातहत रहेको श्रेष्ठ खाजा घर, मदिना होटेल, पुन्टु कलेक्सन, पूर्वाञ्चल वायोमेडिकल, दिपेश शाकाहारी खाजाघर, रहिम मोटरसाइकल मर्मत सेन्टर, मोनिका फार्मेसी, निरुपमा होटेल र दुई वटा खाली सटर, नेपाल रेडक्रस सोसाइटी मोरङ मातहत रहेको सुनिल भेराइटिज, सुभना ट्रेडर्स, त्रिवेणी फोटोकपी स्टुडियो, राष्ट्रिय वाणिज्य बैंकको दुई हल, कोशी मोबाइल, मिना मेडिकल र देवकोटा पुस्तकालय विराटनगर मातहत रहेको २ बन्द सटर, भट्टराई पान पसल, सुवान सैलुन, देवकोटा हेयर कटिङ, मोःमोः हाउस, सुपर सङ्गीत आर्टस्, देवकोटा होटेल, पान पसल र देवकोटा पुस्तकालयको मूल भवनमा डोजर चल्ने जानकारी गराए ।
गणेश मन्दिर, ब्लड बैंकको मूल भवन, वाणिज्य बैंक, देवकोटा पुस्तकालय र नेपाल क्षयरोग निवारण संस्थाको भित्री भवनमा तत्कालै डोजर नचल्ने प्रमुख मेडिकल सुपरिटेन्डेन्ट डा. झाले जानकारी गराए ।
