• ब्रह्ममदेव यादव, विराटनगर १२९६  पटक हेरिएको

बिहिबार, भाद्र १२, २०८२ समय : १४:२८:५७ , २ दिन अगाडि

विराटनगरका स्वतन्त्र राजनीतिज्ञ उमेश यादवले मधेशीलाई एक ठाउँमा ल्याउने अभियान सुरु गरेका छन् । विराटनगर सहित मोरङ जिल्ला भरीका मधेशी समुदायलाई एक ठाउँमा ल्याएर उनीहरूको हक र अधिकारको ग्यारेन्टी गर्ने उद्देश्यका साथ यादवले अभियान सञ्चालनमा ल्याएको हो

जुन अभियानलाई मधेशी उत्थान विचार मञ्च मोरङ नाम दिइएको छ । मञ्चले यही भाद्र १४ गते शनिबार विराटनगरको कञ्चजगां पार्टी प्यालेसमा कोशी प्रदेशको राजनीतिक, मोरङको विकास  र वर्तमान अवस्थामा राष्ट्रिय राजनीतिक विषयका बारेमा मधेशी समुदायसँग वृहत छलफल कार्यक्रम गर्न लागेको छ ।

देशका बुद्धिजीवी तथा राजनीतिक विश्लेषक, विभिन्न राजनीतिक दलमा आबद्ध पदाधिकारी, मधेश आन्दोलनमा सक्रिय भूमिका निर्वाह गरेका व्यक्ति तथा हाल स्वतन्त्र रहेका २ सय भन्दा बढी मधेशीहरु छलफल कार्यक्रममा सहभागिता जनाउने यादवले बताए ।

विराटनगरमा नाम चलेका उमेश यादव, रञ्जित झा, पंकज वर्मा, ओसिम आलम, जोगिलाल यादव, सञ्जय सिंह, रामविलास यादव, मन्थलाल यादव, रमेश यादव, मृतुन्जय झा, मो. कादिर, प्रविण नायरण चौधरी, जफल जमाली छलफल कार्यत्रममा सहभागिता जनाएर मधेशीलाई आफ्नो हक अधिकार प्राप्तिका लागि एक ठाउँमा आउन आग्रह गर्नेछ ।

साथै मधेशी माथि भइरहेको थिचोमिचो र विभेदका विरुद्ध प्रतिकार गर्न एक्सन कमिटीको गठन गर्नेछ । उमेश यादवले पत्रकार सम्मेलन गरेर मधेशीलाई एक ठाउँमा ल्याउन अभियान सञ्चालन गर्न लागेको जानकारी गराए । पत्रकार सम्मेलनमा यादवले भने : जसरी मुस्लिम बाहुल्य देश पाकिस्तानमा हिन्दुहरुको दयनिय अवस्था छ । ठिक त्यसै प्रकार विराटनगरमा बसोबास गरिरहेका मधेशीहरुको अवस्था दयनिय छ ।

विराटनगरमा ६३ प्रतिशत मधेशी समुदायको जनसङ्ख्या छ । तर राजनीतिमा मधेशीको सहभागिता निराशा जनक छ । देशको प्रमुख राजनीतिक दल नेपाली कांग्रेस र नेकपा एमालेमा मधेशी समुदायको नेता नै छैन । समावेशीको नाममा ठाउँ पाएका नेताहरूको यी दुवै पार्टीमा केही पनि चल्दैन । र मधेशी माथि भइरहेको थिचोमिचो अन्याय र अत्याचारका विरुद्ध एक शब्द पनि बोल्न सक्दैन ।

कांग्रेसमा कोशी प्रदेश कोषाध्यक्ष राजेश गुप्ता बाहेक अरूले मञ्चमा कुर्सी पाउन सक्ने अवस्था छैन । समावेशीको नाममा केही मधेशी स्थानीय तहमा जनप्रतिनिधि छ । तर जनसंख्यको आधारमा जति जनप्रतिनिधि निर्वाचित हुनु पर्ने हो त्यही निर्वाचित हुन सकिरहेका छैनन् । अर्थात् जनसंख्याको आधारलाई धज्जी उडाउँदै गैर मुधेशी समुदायले विराटनगरमा मधेशी माथि शासन गरिरहेका छन् ।

जसका विरुद्ध मधेशीलाई एक ठाउँमा ल्याएर उनीहरूको हक र अधिकारका बारेमा सामूहिक आवाज उठाउन मञ्च तयार गर्न लागेको यादवले बताए । पत्रकार सम्मेलनमा यादवले भने : मधेश आन्दोलन पछि विराटगनरमा मधेशी समुदायको दबदबा थियो । तर यतिखेर मधेशी माथि थिचोमिचो भइरहेको छ ।

यादवले अगाडी थपे : म आफै असुरक्षित महसुस गरिरहेको छु । अरू मधेशीको अवस्था के छ त्यहीबाट बुझ्न सकिन्छ । यस्तो अवस्थामा बहुसंख्यक मधेशीले असमानताका विरुद्ध अल्पसंख्यक गैर मेधशीका विरुद्ध आवाज उठाउन मधेशी उत्थान विचार मञ्च मोरङ गठन गरेर अगाडि बढेको यादवले बताए ।