• ब्रह्मदेव यादव, विराटनगर ४१५  पटक हेरिएको

शुक्रबार, मंसिर १२, २०८२ समय : १३:३६:४१ , २१ घन्टा अगाडि

नेपाल–भारतको अन्तर्राष्ट्रिय सिमानाका खुकुलो छ । विराटनगर महानगरपालिकासँग सिमाना जोडिएको रानी नाकाबाट सशस्त्र प्रहरीको मिलोमत्तोमा कपडाको तस्करी भइरहेको छ ।

सशस्त्र प्रहरी बल रानी गुल्मका प्रमुख डिएसपी विकास खतिवडाको कार्यकाल सकिन लागेको छ । र उनले रानी गुल्मको कमाण्ड छोड्नु अघि रानी नाकालाई खुकुलो पारेका छन् । र तस्कर सँगको मिलोमत्तोमा तस्करीलाई प्रोत्साहन गरिरहेका छन् ।

डिएसपी खतिवडाले प्रत्येक दिन तस्कर गिरोहलाई कपडाको लाइन दिएर अवैध रूपमा लाखौँ रुपैयाँ असुली गरिरहेको विराटनगर भन्सार कार्यालय निकट समाचार सूत्रले जानकारी गराएको छ ।

यतिखेर विवाह लगनको साइत छ । काठमाडौँबाट विराटनगर आइपुगेका तस्कर गिरोहले सशस्त्र प्रहरीका डिएसपी खतिवडासँग सेटिङ मिलाएर विवाहको लागि कपडा खरिद गरेको भन्दै अर्कोको विवाह कार्ड देखाएर मोटो रकम बराबरको कपडा तस्करी गरिरहेका छन् ।

नेपालको तुलनामा भारतको विहार राज्यस्थित जोगबनी बजारमा सटिङ–सुटिङदेखि साडी र कुर्तासलवारको कपडा ५० प्रतिशतले सस्तो छ । पछिल्लो समय भारत सरकारले जिएसटी करमा भारती कटौती गरेपछि कपडा सस्तो भएको हो ।

एउटा विवाहका लागि बेहुला बेहुली र आफन्तका लागि नेपालमा कपडा खरिद गर्दा ५ लाख रुपैयाँ भन्दा बढी खर्च लाग्छ । त्यही कपडा भारतको जोगबनी बजारमा खरिद गर्दा २ देखि ३ लाख रुपैयाँले पुग्छ । केही रकम भए पनि बचत गर्न सर्वसाधारण नेपालमा किनमेल नगरी जोगबनी जाने गरेका छन् ।

सस्तो खरिदकालागि देशभरीका मानिस विराटनगर हुँदै जोगबनी पुग्ने गरेका छन् । तस्कर गिरोहले पनि मौकाको फाइदा उठाउँदै विवाहको लगनमा सशस्त्र प्रहरीसँग सेटिङ मिलाएर कपडा तस्करी गरिरहेका छन् ।

सिमाना सुरक्षाको जिम्मेवारी सम्हाली रहेका सशस्त्र प्रहरी मैन छन् । राज्य उदासीन छ । सशस्त्र प्रहरी बल रानी गुल्मका प्रमुख डिएसपी खतिवडा कपडा तस्करीको बारेमा केही बोल्न चाहेनन् ।